Här President,
Esou wéi den Artikel 80 vum Chambersreglement et virgesäit, bieden ech Iech, dës parlamentaresch Fro un d’Madamm Minister fir Mobilitéit an ëffentlech Aarbechten weider ze leeden.
Wa Betriber un ëffentlechen Ausschreiwungen deelhuelen, musse si an deene meeschte Fäll eng Erklärung ausfëllen an ënnerschreiwen, an där si zertifizéieren, dass hire Betrib déi néideg legal Viraussetzungen erfëllt, fir dierfe bei enger Ausschreiwung matzemaachen. Dës Démarche muss e Betrib bei all Ausschreiwung op en Neits maachen. D’Dokument, em dat et geet, déi sougenannten Eegenerklärung, ass harmoniséiert op europäeschem Niveau a besser bekannt ënnert dem Numm “document unique de marché européen”, ofgekierzt DUME.
Am Kader vun de Bestriewunge vun dëser Regierung fir administrativ Virgäng ze vereinfachen, mat ënner Anerem der Verallgemengerung vum “once only” Prinzip, kann ee sech froen, ob d’Ausfëllen vum DUME Dokument net och kéint ënnert dee Prinzip falen. Wa Betriber, besonnesch Kleng- a Mëttelbetriber aus dem Handwierk, den DUME wéinstens nëmmen ee Mol am Joer missten ausfëllen fir all d’Ausschreiwungen fir dat kommend Joer, géif dat manner Opwand fir si duerstellen. Dëst kéinte si zum Beispill iwwert de PMP Portal maachen, an op dëser Plaz och aner Informatiounen iwwert hire Betrib uginn, déi relevant si fir un Ausschreiwungen deel ze huelen. Et wär eng begrenzten Ännerung, awer och mat klenge Moossnamen kann een de Betriber et méi einfach maachen.
An deem Kontext wollt ech follgend Froen un d’Madame Minister fir Mobilitéit an ëffentlech Aarbechten stellen:
- Wéi steet d’Madamm Minister zu dësem Vereinfachungsvirschlag, dee fir d’Betriber a besonnesch fir méi kleng Betriber, eng grouss Erliichterung a Vereinfachung duerstelle giff?
- Wéi eng Kadenz wär sënnvoll, fir d’DUME auszefëllen, dat och souguer manner dacks wéi ee Mol pro Joer?
- Wär d’Madamm Minister och bereet, de “once only” Prinzip fir DUME anzeféieren?
- Wou kann de “once only” Prinzip nach ugewant gi bei ëffentlechen Ausschreiwungen?
Här President, ech bieden Iech, mäin déifste Respekt unzehuelen.
Octavie Modert
Deputéiert
Zréck