Här President,
Esou wéi et am Artikel 80 vum Chambersreglement virgesinn ass, géing ech Iech bieden, dës parlamentaresch Fro un d’Madamm Gesondheetsministesch weiderzeleeden.
Rezent Statistiken aus Däitschland weisen, datt d’Zuel vu jonke Meedercher a jonk Fraen, déi wéinst enger Iessstéierung wéi Magersucht oder Bulimie stationär musse behandelt ginn, an de leschten 20 Joer däitlech geklommen ass. Dobäi ass net nëmmen d’Zuel eropgaangen, mee och den Undeel vun ëmmer méi jonke Patientinnen. Deen Trend kéint och fir Lëtzebuerg relevant sinn. An deem Kontext wéilt ech der Madamm Gesondheetsministesch follgend Froe stellen:
- Wéi eng Donnéeën huet de Gesondheetsministère iwwert d’Zuel vu Patientinnen a Patienten, déi an de leschten 20 Joer zu Lëtzebuerg stationär wéinst enger Iessstéierung behandelt goufen, opgeschlësselt no Alterskategorien a Geschlecht?
- Huet de Ministère festgestallt, datt et och hei am Land eng Tendenz gëtt, datt ëmmer méi jonk Patientinnen – besonnesch am Alter tëschent 10 a 17 Joer – betraff sinn?
- Wéi vill Patiente ginn ambulant behandelt?
- Wéi laang mussen d’Patienten am Duerchschnëtt waarden, bis se eng Therapieplaz kréien a wéi laang dauert esou eng Therapie?
- Wéi vill Patiente musse fir eng Behandlung an d’Ausland geschéckt ginn?
- Wat fir Präventiouns- a Sensibiliséierungsmoossname ginn aktuell ëmgesat, besonnesch fir jonk Leit, fir Iessstéierungen ze vermeiden oder fréi ze erkennen?
- Ass geplangt, zousätzlech Mesuren ze huelen, fir dem Trend entgéintzewierken, falls en och zu Lëtzebuerg confirméiert gëtt?
Här President, ech bieden Iech, mäin déifste Respekt unzehuelen.
Nancy Arendt,
Deputéiert
Zréck