Här President,
Esou ewéi den Artikel 81 vum Chambersreglement et virgesäit, bieden ech Iech, dës drénglech parlamentaresch Fro un d’Madamm Gesondheetsminister an un den Här Educatiounsminister weiderzeleeden.
D’Grondschoul ass eréischt e puer Deeg amgaang, a scho sëtze Kanner a Quarantaine. Well se Covid-19-Symptomer hunn, oder well se mat positiv geteste Kanner a Kontakt waren.
Well et de „Large Scale Testing“ zanter dem 15. September net méi gëtt, musse Kanner mat Covid-19-Symptomer fir d’éischt eng Télé-Consultatioun mat engem Dokter maachen, fir uschléissend e Rendez-vous fir e gratis PCR-Test kënnen unzefroen. Den Zäitopwand geet doduerch erop.
Virun dësem Hannergrond wéilt ech folgend Froen un d’Madamm Gesondheetsminister an un den Här Educatiounsminister stellen :
- Wéi vill Kanner sinn zanter dem 15. September an der Grondschoul a Quarantaine gesat ginn?
- Kann den Här Educatiounsminister en Tableau mat detailléierten Zuelen zu de „Mises en quarantaine“ zanter dem Grondschoulufank virleeën, opgeschlësselt no Regionaldirektiounen a Gemengen, an ënnerdeelt a „positiv op Covid-19 getest“ respektiv „mat engem positiv geteste Kand a Kontakt gewiescht“?
- Kann d’Madamm Gesondheetsminister confirméieren, dass d’Covid-19-Hotline zanter dem Schoulufank am Fondamental iwwerlaascht ass?
- Wa jo, wéi eng Mesuren gedenkt d’Madamm Gesondheetsminister en Place ze setzen, fir ze verhënneren, dass den Tracing retardéiert gëtt?
- Wéi stinn d’Madamm Gesondheetsminister an den Här Educatiounsminister zum Zäitverloscht, dee sech aus der Noutwendegkeet ergëtt, en Dokter ze consultéieren, fir eng Ordonnance fir e gratis PCR-Test fir e Kand ënner zwielef Joer ze kréien?
- Firwat verschéckt de Ministère de la Santé net automatesch eng Ordonnance fir e gratis PCR-Test, wann d’Eltere vun engem Kand mat Symptomer a positivem Schnelltest de „Contact Tracing“ kontaktéiert hunn?
- Wéi wëll den Här Educatiounsminister de Wëssensréckstand opfänken, dee bei deene Kanner entsteet, déi a Quarantaine gesat ginn?
Här President, ech bieden Iech, mäin déifste Respekt unzehuelen.
Martine Hansen
Co-Fraktiounspresidentin
Zréck