Stéphanie Weydert war en Donneschdeg de Moien am Moiesstudio vun 100,7. Am Interview huet d’CSV-Deputéiert iwwer de Gesetzesprojet 8584 zur automatescher Autosplackenerkennung, den ANPR-System, geschwat. Als Presidentin vun der zoustänneger Chamberkommissioun huet si op d’Kritik vum Staatsrot reagéiert. Beim sougenannten ANPR-System ginn Autosplacke mat Kameraen automatesch erkannt. De Projet soll der Police virun allem beim Kampf géint Terrorismus a schwéier organiséiert Kriminalitéit an bei der Sich no gesichten oder vermësste Persounen hëllefen. De Staatsrot huet awer Bedenke ënner aanerem beim Dateschutz geäussert.
„Mir brauche modern Instrumenter fir eis Sécherheet“
Am Interview huet d'Stéphanie Weydert ënnerstrach, datt d’Zil vum Gesetzesprojet fir d’CSV weider richteg ass. Lëtzebuerg misst déi néideg Moyene kréien, fir géint grenziwwerschreidend Kriminalitéit an Terrorismus virzegoen.
Si huet dobäi op d’Zesummenaarbecht mat den Nopeschlänner verwisen. Lëtzebuerg kéint haut bei Enquêten op Informatioune vun auslännesche Systemer zeréckgräifen, hätt selwer awer nach keen entspriechenden Dispositif, fir Informatiounen auszetauschen.
Gläichzäiteg huet d'Stéphanie Weydert kloer gemaach, datt Sécherheet an de Schutz vun de Grondrechter Hand an Hand musse goen.
„Mir sinn an engem Rechtsstaat. Do huet all Bierger seng Grondrechter, an déi musse mer natierlech schützen“, sot si am Interview. Wann de Gesetzesprojet op verschiddene Punkte net präzis genuch ass, misst nogebessert ginn.
Méi kloer Reegele fir den Asaz vun de Kameraen
Ee vun de Kritikpunkte vum Staatsrot betrëfft d’Fro, ënner wéi enge Konditioune fest oder mobil Kameraen däerfen agesat ginn.
Fir d'Stéphanie Weydert kann een hei méi präzis ginn. Et kéinten zum Beispill kloer Kritäre festgeluecht ginn oder eng Prozedur, déi definéiert, wien decidéiert, wéini a wou eng Kamera agesat gëtt.
D’CSV-Deputéiert huet am Interview awer och bedauert, datt de Staatsrot de Projet no 16 Méint grondsätzlech kritiséiert huet, ouni déi eenzel Artikelen detailléiert ze analyséieren.
De Projet gëtt elo analyséiert an nogebessert
Wéi de Gesetzestext konkret ugepasst gëtt, ass nach net decidéiert.
No den Aussoe vum Stéphanie Weydert soll de Ministère den Avis vum Staatsrot elo am Detail analyséieren an déi néideg Ännerunge virbereeden. Duerno gëtt de Projet an der zoustänneger Chamberkommissioun weider diskutéiert.
Ob dës Ännerungen iwwer Regierungsamendementer oder parlamentaresch Amendementer gemaach ginn, wier de Moment nach ze fréi ze soen.
Fir d'Stéphanie Weydert bleift d’Zil kloer: de Gesetzesprojet esou nobesseren, datt Lëtzebuerg e wierksamt Instrument géint schwéier Kriminalitéit kritt an d’Grondrechter vun de Bierger gläichzäiteg geschützt bleiwen.
Kuerz FAQ: Wat ass den ANPR-Projet?
Wat ass ANPR?
ANPR steet fir „Automatic Number Plate Recognition“. Kamerae kënnen Autosplacke erkennen an d’Informatioune mat relevante Fichiere vergläichen.
Firwat wëll Lëtzebuerg esou e System aféieren?
De System soll virun allem beim Kampf géint Terrorismus a schwéier Kriminalitéit an bei der Sich no gesichten oder vermësste Persounen agesat ginn.
Wat kritiséiert de Staatsrot?
Ënner anerem misst méi kloer geregelt ginn, ënner wéi enge Konditioune Kameraen agesat ginn a wéi de Schutz vu perséinlechen Donnéeë garantéiert gëtt.
Wat seet d'Stéphanie Weydert dozou?
Si hält den ANPR-System fir wichteg, seet awer och, datt de Gesetzestext nogebessert muss ginn, wa juristesch Garantien net kloer genuch definéiert sinn.
Ass de Gesetzesprojet schonn definitiv decidéiert?
Nee. De Projet ass nach am legislative Prozess a soll no der Kritik vum Staatsrot weider iwwerschafft ginn.