D'Prisongen zu Lëtzebuerg stinn ënner Drock. Besonnesch am Untersuchungsprisong Uechterhaff zu Suessem ass d'Plaz knapp. An der RTL-Emissioun „Studio 2“ huet d'Justizministesch Elisabeth Margue erkläert, wéi d'Regierung d'Situatioun verbessere wëll. Nieft méi Prisongsplaze setzt si op zousätzlecht Personal a méi séier Justizprozeduren.
Méi Police a méi Justiz féieren och zu méi Verhaftungen
Datt aktuell méi Leit an de Prisongen ënnerbruecht sinn, huet der Justizministesch no verschidden Ursaachen. Eng dovunner wier déi verstäerkte Policepräsenz an de weideren Ausbau vun der Justiz.
Méi Police um Terrain a méi Personal an der Justiz géifen et erlaben, méi konsequent géint Strofdote virzegoen. Dat géif sech och bei der Zuel vun de Leit an Untersuchungshaft bemierkbar maachen. Besonnesch bei Déifstall an Drogendelikter wier dat de Fall.
Fir d'Elisabeth Margue ass dowéinst kloer, datt nieft zousätzleche Prisongsplazen och d'Justizprozedure musse beschleunegt ginn.
Schraasseg soll ausgebaut ginn – och Giewenech ass eng Optioun
Ee vun de gréisste Projete betrëfft de Prisong zu Schraasseg. No den aktuellen Iwwerleeunge kéint d'Kapazitéit do vu ronn 450 op 672 Plazen eropgoen. De Projet soll a verschiddenen Etappe realiséiert ginn, wärend de Prisong weider a Betrib bleift.
D'Pläng sollen an der „Commission d'analyse critique“ gepréift ginn. Dobäi geet et och drëms, d'Käschten an den Ëmfang vum Projet ofzestëmmen.
Well den Ausbau zu Schraasseg Zäit brauch, sicht d'Regierung och no kuerz- a mëttelfristege Léisungen. Eng Méiglechkeet wier, um Site vum Prisong zu Giewenech zousätzlech Plazen ze schafen. Do wier genuch Terrain disponibel, sou d'Justizministesch.
42 zousätzlech Poste fir d'Prisongsverwaltung
Nieft den Infrastrukture spillt och d'Personal eng zentral Roll. D'Elisabeth Margue huet annoncéiert, datt d'Prisongsverwaltung dëst Joer 42 zousätzlech Poste kritt. Dat wiere méi wéi duebel esou vill Poste wéi an de Jore virdrun.
Méi Personal géif zwar net all Problem léisen, mee et géif de Mataarbechter erlaben, ënner bessere Konditiounen ze schaffen an d'Prisonéier besser ze betreien.
Méi séier virun de Riichter
Eng weider Mesure ass d'„Comparution accélérée“. Dës nei Prozedur, déi sech nach am legislative Prozess befënnt, soll et erlaben, verschidde méi einfach Strofdoten däitlech méi séier ze behandelen.
D'Zil ass, datt betraffe Persoune bannent engem Mount no hirer Verhaftung virun de Riichter kommen. Aktuell bleiwen d'Leit am Uechterhaff an der Moyenne ronn 3,6 Méint an Untersuchungshaft.
Mat méi séiere Prozedure wëllt d'Justizministesch den Drock op d'Untersuchungsprisongen reduzéieren. Gläichzäiteg sollen och d'Affer vun enger méi séierer Justiz profitéieren.
Resozialisatioun bleift wichteg
D'Elisabeth Margue huet och d'Bedeitung vun der Resozialisatioun ënnerstrach. Besonnesch zu Giewenech géif et drëms goen, Prisonéier op hiert Liewen no der Haft virzebereeden.
D'Justizministesch wëllt awer net einfach d'Konditioune fir alternativ Strofen oder elektronesch Foussfesselen oplackeren. Entscheedend wier, ob déi betraffe Persounen déi gesetzlech Konditiounen erfëllen an ob dës Form vum Strofvollzuch fir hire Profil gëeegent ass.
Och fir déi Jonk ginn nei Léisunge gesicht
Eng weider Erausfuerderung ass d'Ënnerbréngung vu Mannerjäregen. Well d'Unisec zu Dräibuer voll ass, goufen och Jonker am Prisong zu Schraasseg ënnerbruecht.
D'Regierung schafft un engem neie Jugendprisong um Site vun Dräibuer. Zousätzlech gëtt gepréift, ob do eng hallefoppen Struktur kéint entstoen.
Parallel dozou gëtt zesumme mat den zoustännege Ministèrë fir Educatioun a Gesondheet no anere Betreiungsméiglechkeete gesicht. Besonnesch fir Jonker, déi Schutz a Betreiung brauchen, ouni datt si onbedéngt stroffälleg gi sinn.
Fir d'Elisabeth Margue geet et drëms, kuerzfristeg besser Konditiounen ze schafen a gläichzäiteg déi néideg Strukture fir d'Zukunft virzebereeden.