Steierreform 2028: Eng eenheetlech Steierklass fir jiddwereen

Méi Netto vum Brutto. Manner Steieren.

2028 kritt Lëtzebuerg eng nei, eenheetlech Steierklass 

Si heescht Steierklass „U“ an mecht de Steiersystem méi einfach a méi gerecht

Am neie System gëllen déi selwecht Steierreegele fir jiddwereen. 

Egal obs du eleng, bestuet oder gepacst bass.

Wat bréngt d'Reform konkret?

• Méi Kafkraaft a méi Entlaaschtung fir Leit
• Méi Stabilitéit a Planungssécherheet
• Méi steierlech Ënnerstëtzung fir Familljen a Kanner
• Méi Gerechtegkeet tëscht de verschiddene Familljemodeller

Déi nei Steierklass soll den 1. Januar 2028 a Kraaft trieden. 

Fir Leit, déi haut an der Steierklass 2 sinn, ass eng Iwwergangszäit vu 25 Joer virgesinn.

D’Fräi Tribün vum 26. Oktober 2026 stung ënnert dem Tittel : 
Manner Steieren, Méi Netto vum Brutto.

Dës Woch gouf déi grouss Steierreform vum Finanzminister Gilles Roth an der Chamber gestëmmt.

Am Viirfeld vun deem Vott hunn d’Rapportrice vum Gesetz d’Diane Adehm an de Michel Wolter an engem Podcast déi grouss Reform erkläert an op d’Kritike vun den Oppositiouns-Parteien reagéiert. De Frank Kuffer resuméiert d’Aussoe vun den zwee CSV-Deputéierten:

Steierreform 2028: Déi wichtegst Froen an Äntwerten

1. Wat ännert sech mat der Steierreform 2028?

Vum Steierjoer 2028 u gëtt et eng eenheetlech Steierklass fir all d’Leit zu Lëtzebuerg.

Déi aktuell Steierklassen 1, 1a an 2 ginn domat no an no ofgeschaaft.

An Zukunft soll net méi de Familljestand entscheeden, no wéi engem Steierbarème ee besteiert gëtt.

D’Zil ass e méi einfachen a moderne Steiersystem.

E Steiersystem, dee mat der Zäit geet.

Eng Steierklass fir jiddwereen. Méi einfach, méi transparent a méi fair.

2. Wat bedeit déi nei Steierklass konkret fir mech?

D'Steierreform bedeit fir d'Leit eng finanziell Entlaaschtung. Méi Netto vum Brutto. Keen soll no der Reform méi Steiere bezuelen. 

Gläichzäiteg bréngt déi nei Steierklass méi Stabilitéit a méi Planungssécherheet. Wann ee bestuet gëtt, sech scheede léisst oder säi Partner verléiert, ännert sech an der neier Steierklass U net méi automatesch d’Besteierung. 

D'Zil ass kloer: Méi Netto vum Brutto, ouni datt Leit duerch d'Ëmstellung op déi nei Steierklass finanziell verléieren. 

Dofir gëtt et besonnesch fir déi aktuell Steierklass 2 eng laang Iwwergangszäit.

3. Wéini trëtt d'Steierreform a Kraaft?

Déi nei Steierklass gëllt vum 1. Januar 2028 un.

Si gëllt direkt fir all déi, déi vun deem Datum un nei an de Steiersystem kommen. Zum Beispill Jonker, déi hir éischt Aarbecht ufänken.

Fir Leit, déi schonn am Steiersystem sinn, ginn et ënnerschiddlech Reegelen. Si hänken vun der aktueller Steierklass oof.

4. Wat geschitt mat de Steierklassen 1 an 1a?

Léit, déi elo an der Steierklass 1 oder 1a sinn, wiesselen den 1. Januar 2028 automatesch an déi nei Steierklass U.

Dat betrëfft ënner anerem Jonggesellen, Elengerzéier, Wittleit a Leit iwwer 64 Joer.

Déi nei Steierklass U ass fir dës Leit finanziell méi virdeelhaft. 

Si profitéiere vun engem méi gënschtege Steierbarème a bezuelen domat bei engem vergläichbare besteierbaren Akommes manner Steieren.

Rechebeispiller Steierklass 1 an 1a 

5. Wéi profitéieren Elengerzéiend vun der Steierreform?

No den massive steierlechen Entlaaschtungen an de Joeren 2024 a 2025 kreien Elengerzéiend nach eng Kéier méi steierlech Ënnerstëtzung.

De maximale Steierkreditt fir Elengerzéiend klëmmt vu 3.504 op 4.008 Euro d'Joer.

Schonn 2025 war dëse Steierkreditt ëm ronn 1.000 Euro erhéicht ginn.

Domat ginn Elengerzéiend, déi dacks eleng fir d'Käschte vun hire Kanner opkommen, weider entlaascht.

Rechebeispiller:

6. Wat ännert sech fir Leit an der Steierklass 2?

Leit, déi virun dem 1. Januar 2028 an der Steierklass 2 sinn, kreien de Choix.

Dës Leit kënnen:

• wärend enger Iwwergangszäit vu 25 Joer an der aktueller Steierklass 2 bleiwen;
• oder an déi nei Steierklass U wiesselen.

Wichteg: E Wiessel an d'Steierklass U ass definitiv. 

Wien sech dofir entscheet, kann duerno net méi an déi al Steierklass 2 zeréckwiesselen.

7 . Firwat eng Iwwergangszäit vu 25 Joer an der Steierklass 2  ?

Net fir all Koppel ass en direkten Wiessel an d‘Steierklass U finanziell interessant. Dat gëllt virun allem fir Stéit mat nëmmen engem Akommes oder mat enger grousser Differenz tëscht den Akommes vun de Partner.

Duerch déi 25 Joer Iwwergangszäit kënnen dës Stéit hire bisheerege steierleche Virdeel nach bis Enn 2052 behalen. 

Dat gëllt fir all bestueten oder gepacste Koppelen, ob Resident oder Grenzgänger.

Rechebeispiller:

8. Wat ännert sech fir Famillje mat klenge Kanner?

Bei der Steierreform sti Famillje mat klenge Kanner am Mëttelpunkt. Si ginn zousätzlech steierlech entlaascht.

Dofir gëtt en neien Abattement petite enfance agefouert.

Elteren, déi ab dem 1. Januar 2028 an der neier Steierklass U besteiert ginn, kënnen pro Kand ënner dräi Joer bis zu 5.400 Euro d'Joer vum besteierbaren Akommes ofsetzen. Dat entsprécht engem Abattement vu 450 Euro de Mount.

Den Abattement gëllt fir Kanner, déi den 1. Januar vum Steierjoer nach keng dräi Joer al sinn.

Wann d’Kand vun zwee Elterendeeler betreit gëtt, gëtt den Abattement gedeelt: 2.700 Euro pro Elterendeel.

9. Wat ännert sech fir Elteren, deenen hir Kanner net bei hinne wunnen?

Och Elteren, deenen hir Kanner net am eegene Stot liewen, kënne vun enger méi héijer steierlecher Entlaaschtung profitéieren.

Den entspriechenden Abattement klëmmt vu 5.424 op 5.928 Euro d'Joer.

Dat betrëfft zum Beispill Elteren, déi fir e Kand, dat beim aneren Elterendeel wunnt, Ënnerhalt bezuelen.

10. Wat geschitt steierlech bei enger Scheedung oder wann de Partner stierft?

Haut kënnen déi betraffe Leit nom Doud vum Partner oder enger Scheedung nach dräi Joer vum Tarif vun der Steierklass 2 profitéieren. 

Mat der Reform gëtt dës Iwwergangszäit op fënnef Joer verlängert.

Dat gëllt fir Leit, déi am Kader vun der Iwwergangsreegelung vun 25 Joer beim ale Steierregimm bleiwen.

Esou hu si méi Zäit, sech finanziell op hir nei Liewenssituatioun anzestellen.

Fir Leit an der neier Steierklass U bleift de Steierbarème nom Doud vum Partner oder bei enger Scheedung dee selwechten.

11. Wat ass, wann ech manner schaffen, fir mech ëm meng Famill ze këmmeren?

Wie seng Aarbechtszäit reduzéiert oder seng Beruffsaktivitéit ënnerbrécht, fir sech ëm d'Kanner oder ëm Familljememberen ze këmmeren, soll besser bei der Pensioun ofgeséchert kënne ginn.

Eng Méiglechkeet ass déi fräiwëlleg Pensiounsversécherung. Domat kënne weider Pensiounsrechter opgebaut ginn.

Vun 2028 un wäerten d'Cotisatiounen, déi eng Persoun fir hire Mann, hir Fra oder hire gepacste Partner an eng fräiwëlleg Pensiounsversécherung abezilt, steierlech ofsetzbar sinn.

Dat gëtt de Familljen méi Flexibilitéit an hëlleft gläichzäiteg Altersaarmut ze vermeiden.

12. Wéi eng weider Ausgabe kann ech steierlech ofsetzen?

Mat der Steierreform ginn verschidde Plaffongen fir d'Ofsetzbarkeet vun Ausgaben erhéicht.

• Versécherungen a Kredittzënsen

De Plafong fir bestëmmte Versécherungsbäiträg, Mutualitéiten an Zënsen op private Kreditter klëmmt vu 672 op 900 Euro pro Persoun.

• Bauspueren

Fir Bauspuerverträg klëmmt de Plafong vu 672 op 900 Euro. Fir Leit tëscht 18 a 40 Joer inclus ass eng Erhéijung vun 1.344 op 1.500 Euro virgesinn.

• Haushaltshëllef, Fleeg a Kannerbetreiung

Den entspriechende steierlechen Abattement klëmmt vu 5.400 op 6.000 Euro d'Joer.

Och bei aussergewéinleche finanzielle Belaaschtunge ginn d'Akommesgrenzen ugepasst, fir d'Leit méi ze entlaaschten.

13. Gëtt Steiertabel an Zukunft un d'Inflatioun ugepasst?

Jo. D'Steierreform gesäit vir, de Steierbarème reegelméisseg un d'Inflatioun unzepassen.

No véier Indextranchen soll de Steierbarème ugepasst ginn.  Dat soll verhënneren, datt d'Leit eleng duerch d'Indexéierung vun hirem Loun ëmmer méi staark besteiert ginn, obwuel hir Kafkraaft net am selwechte Mooss klëmmt.

14. Wat kascht d'Steierreform de Staat?

Fir 2028 ginn d'Käschte vun der Reform op ronn 880 Milliounen Euro geschat.

Dat ass eng Investitioun an d’Kaafkraaft vun de Léit.

15. Wéini kann ech kucken wat d'Steierreform fir mech bedeit?

D'Joer 2027 soll genotzt ginn, fir d'Steierverwaltung an d'Bierger op déi nei Reegelen virzebereeden.

Fir Ufank 2027 ass en Online-Steierrechner virgesinn. Domat soll jiddweree kënne rechnen, wat déi nei Steierklass fir seng perséinlech Situatioun bedeit.

Zousätzlech kënnen d’Leit sech direkt bei de Steierbüroen berode loossen.

Och e mobille Steieratelier, de sougenannte Steierbus, soll d'Berodung méi no bei d'Leit bréngen.

MÉI KAFKRAAFT. MÉI ËNNERSTËTZUNG. MÉI PERSPEKTIVE FIR EIS FAMILLJEN.

Nierft der Steierreform mat enger Steierklass fir jiddwereen ass et och eis Aufgab, d'Kafkraaft vun de Familljen nohalteg ze stäerken an ze schützen. Dat virunallem an enger Zäit, an där d'Liewenskäschte staark geklomme sinn,

Dofir féiere mir ab dem 1. Januar 2027 weider konkret Mesuren an, déi d'Familljen am Alldag entlaaschten an hir finanziell Situatioun nohalteg verbesseren.

Kannergeld 2027: Bis zu 60 Euro méi de Mount pro Kand 

D'Kannergeld gëtt spierbar erhéicht: ëm 45 Euro pro Mount fir Kanner ënner 12 Joer op an ëm 60 Euro pro Mount fir Kanner iwwer 12 Joer.  

Dat op 360 Euro fir Kanner ënner 5 Joer, 384 Euro de Mount fir Kanner bis 12 Joer a 434 Euro fir Kanner iwwer 12 Joer.

Méi Sue fir de Schoulufank

Och d'Allocation de rentrée scolaire gëtt däitlech verbessert. Si klëmmt vun 115 op 175 Euro fir Kanner vun 6 bis 11 Joer a vu 235 op 325 Euro fir Kanner iwwer 12 Joer. 

Automatesch Indexéierung schützt d'Kafkraaft

Fir sécherzestellen, datt dës Ënnerstëtzunge laangfristeg hir Wierkung behalen, ginn d'Kannergeld, d'Allocation de rentrée scolaire, d'Gebuertszoulag an d'Allocation spéciale supplémentaire an Zukunft rëm automatesch indexéiert.

Sou bleift d'Kafkraaft vun de Familljen och bei steigende Liewenskäschte geschützt.

Bis zu 3.000 Euro zousätzlech Hëllef fir akommesschwaach Familljen

Eis Opmierksamkeet gëllt besonnesch deene Familljen, déi am Alldag op eng méi staark Ënnerstëtzung ugewise sinn. Dofir féiere mir eng nei zousätzlech finanziell Ënnerstëtzung fir verschidde Famillje mat schoulflichtege Kanner an déi je no Alter vum Kand bis zu 3000€ pro Joer kann ausmaachen. Domat bekämpfe mir gezielt de Risiko vu Kanneraarmut an hëllefen domadder deene Familljen, déi dës Ënnerstëtzung am meeschte brauchen. 

Dat Wichtegst op ee Bléck

• +45 € pro Mount Kannergeld fir Kanner ënner 12 Joer

• +60 € pro Mount Kannergeld fir Kanner ab 12 Joer

• Kanner ënner 5 Joer, 360 Euro de Mount 

• Kanner bis 12 Joer, 384 Euro de Mount

• Kanner iwwer 12 Joer, 434 Euro de Mount

• Allocation de rentrée scolaire op 175 € (6–11 Joer) an 325 € (ab 12 Joer)

• Automatesch Indexéierung vum Kannergeld, der Allocation de rentrée scolaire, der Gebuertszoulag an der Allocation spéciale supplémentaire

• Nei Sozialleeschtung fir verschidde Famillje mat niddregem Akommes a schoulflichtege Kanner, bis zu 3.000 € zousätzlech Hëllef jee no Alter vum Kand

Mat dëse Mesure stäerke mir gezielt eis Familljen, am Intérêt vun eise Kanner.