Méi Netto vum Brutto a weider Hëllefe géint héich Energiepräisser

Dës Woch stoung ganz am Zeeche vun der Kafkraaft. Mat der grousser Steierreform an engem neien Tripartite-Accord goufe wichteg Decisioune getraff, déi d'Leit finanziell entlaaschte sollen.

1. Steierreform 2028: Eng Steierklass fir jiddereen

D'Chamber huet dës Woch déi grouss Steierreform vum Finanzminister Gilles Roth gestëmmt. Vun 2028 u kënnt eng nei, eenheetlech Steierklass U. Egal ob Single, bestuet oder gepacst. An Zukunft soll de Familljestand net méi iwwer de Steierbarème entscheeden.

Dat ännert sech konkret:

• Méi Netto vum Brutto: Virun allem Singles ginn duerch den neie Steierbarème entlaascht.

• Eng Steierklass fir jiddereen: Déi aktuell Klassen 1, 1a an 2 ginn no an no ersat.

• 25 Joer Iwwergangszäit: Leit an der Steierklass 2 kënnen am ale System bleiwen oder fräiwëlleg an d'Klass U wiesselen.

• Méi Ënnerstëtzung fir Elengerzéiend: De maximale Steierkredit klëmmt op 4.008 Euro d'Joer.

• Méi Ënnerstëtzung fir jonk Familljen: Bis zu 5.400 Euro steierlechen Ofzuch d'Joer pro Kand ënner dräi Joer.

• Méi Planungssécherheet: Bei enger Scheedung oder beim Doud vum Partner gëtt d'Iwwergangszäit an der Steierklass 2 vun dräi op fënnef Joer verlängert.

  D'Zil: Manner Steieren, méi Kafkraaft an e méi einfachen a gerechte Steiersystem.

2. Tripartite: Energiehëllefe ginn 2027 weider

Och bei den Energiepräisser gëtt et gutt Noriichten. D'Regierung, d'Gewerkschaften an d'Patronat hu sech an der Tripartite op en neien Accord gëeenegt. Déi wichtegst Hëllefe ginn bis Enn 2027 verlängert.

Follgend Moossnahemen goufen zeréckbehalen:

• Um Stroum: 4 Cent Hëllef pro Kilowattstonn bis Enn 2027.

• Um Gas: 15 Cent pro Kubikmeter bis Enn 2027.

• Um Mazout: 15 Cent pro Liter bis Enn 2027.

• Um Bensin an Diesel: De Rabatt vu 5 Cent pro Liter bleift bis Enn Februar 2027.

• Index: Den Indexmechanismus bleift integral erhalen.

• Am Februar 2027 gëtt d'Situatioun nach eng Kéier mat de Sozialpartner analyséiert.

D'Zil: D'Leit bei hiren Energiekäschten entlaaschten an d'Präisdeierecht bremsen.

3. Méi Kafkraaft schonn ab 2027

Nieft der grousser Steierreform sinn och weider Entlaaschtunge gestemmt ginn:

• Méi Netto beim Mindestloun: De Steierkredit klëmmt bis Juli 2027 vun 81 op 200 Euro de Mount.

• Zousätzleche Steierkredit fir géint de Kafkraaftverloscht virzegoen: fir Salariéen, Pensionéierter a Selbstänneger, réckwierkend fir Juni bis Dezember 2026.

• Méi Virdeeler beim Bauspueren: Och Leit iwwer 40 Joer kenne ab 2027 bis zu 1344 Euro steierlech geltend machen

Heefeg Froen zur Steierreform 2028 an den Energiehëllefen 2027

Wat ass déi nei Steierklass U zu Lëtzebuerg?

D'Steierklass U ass eng nei eenheetlech Steierklass, déi vum 1. Januar 2028 un a Kraaft triede soll. Si ersetzt no an no déi aktuell Steierklassen 1, 1a an 2. De Steierbarème soll an Zukunft net méi vum Familljestand ofhänken.

Wéini kënnt déi nei Steierklass U?

Déi nei Steierklass U soll den 1. Januar 2028 agefouert ginn. Leit aus de Steierklassen 1 an 1a wiesselen automatesch an déi nei Klass.

Wat geschitt mat der Steierklass 2 am Joer 2028?

Persounen, déi virum 1. Januar 2028 an der Steierklass 2 sinn, kréien eng Iwwergangszäit vu 25 Joer. Si kënnen an der Steierklass 2 bleiwen oder definitiv an déi nei Steierklass U wiesselen.

Wie profitéiert vun der Steierreform 2028?

Déi nei Steierklass U bréngt virun allem fir vill Singles an Elengerzéiend eng steierlech Entlaaschtung. Wéi héich de Virdeel ass, hänkt vum individuellen Akommes an der perséinlecher Situatioun of.

Wéi vill Steierkredit kréien Elengerzéiend ab 2028?

De maximale Steierkredit fir Elengerzéiend soll op 4.008 Euro d'Joer klammen. D'Héicht vum tatsächleche Steierkredit hänkt vum Akommes of.

Wéi ginn Eltere mat Kanner ënner dräi Joer ënnerstëtzt?

D'Steierreform gesäit en neie steierlechen Abattement vu bis zu 5.400 Euro d'Joer pro Kand ënner dräi Joer vir. Dësen Abattement reduzéiert dat besteierbart Akommes, net direkt d'Steier ëm 5.400 Euro.

Wéi vill Steierkredit gëtt et beim Mindestloun 2027?

De Steierkredit fir Persoune mam Mindestloun soll bis Juli 2027 vun 81 Euro op 200 Euro de Mount klammen. Dës Mesure soll d'Nettoakommes vu Leit mat klenge Léin erhéijen.

Wien huet Usproch op de konjunkturelle Steierkredit 2026?

De konjunkturelle Steierkredit ass eng temporär Mesure fir d'Kafkraaft ze ënnerstëtzen. Et profitéieren Salariéen, Pensionéierter a Selbstänneger a gëllt réckwierkend fir d'Period vum 1. Juni bis den 31. Dezember 2026.

Wat ännert sech beim Bauspueren ab 2027?

Vun 2027 u soll de steierlechen Ofzuch beim Bauspuere vu bis zu 1.344 Euro d'Joer och fir Persounen iwwer 40 Joer méiglech sinn. Déi aktuell Altersgrenz fält domat ewech.

Wéi eng Energiehëllefe ginn 2027 zu Lëtzebuerg verlängert?

Mam Tripartite-Accord vum 29. Oktober 2026 ginn d'Hëllefe fir Stroum, Gas a Mazout bis den 31. Dezember 2027 verlängert. Fir Bensinn an Diesel bleift d'Ënnerstëtzung bis den 28. Februar 2027 bestoen.

Wéi héich sinn d'Energiehëllefen 2027?

D'Regierung gesäit folgend Ënnerstëtzunge vir:

• Stroum: 4 Cent pro Kilowattstonn
• Gas: 15 Cent pro Kubikmeter
• Mazout: 15 Cent pro Liter
• Bensinn: 5 Cent pro Liter bis Enn Februar 2027
• Diesel: 5 Cent pro Liter bis Enn Februar 2027

D'Hëllefe gëllen ënner de jeeweilege gesetzleche Konditiounen.

Bleift den Index zu Lëtzebuerg bestoen?

Jo. Den automateschen Indexmechanismus bleift laut dem Tripartite-Accord integral erhalen. Domat bleift d'Upassung vun de Léin a Pensiounen un d'Präisentwécklung bestoen.

Weider Dossieren aus der Chamber

Wat gouf iwwert déi eenzel Punkten an der Chamber diskutéiert ? A wat bedeit dat konkret fir d'Leit? Mir faassen déi wichtegst Aussoe vun eisen CSV-Deputéierten an d'Äntwerte vun de Ministeren zu den eenzele Gesetzesprojeten an Debatten kuerz a verständlech zesummen.

Et ass eng historesch Reform, déi d'Chamber dës Woch um Ordre du jour huet: Mat der Aféierung vun der individueller Besteierung ab 2028 gëtt de Lëtzebuerger Steiersystem grondleeënd moderniséiert. Eng Reform, déi zanter Joerzéngten diskutéiert gëtt an déi den CSV-Finanzminister Gilles Roth elo ëmsetzt. „Mission accomplie“, huet d'CSV-Deputéiert Diane Adehm an hirer Ried ënnerstrach. Domat gëtt e zentralt CSV-Walverspriechen ageléist: méi Netto vum Brutto. Am Mëttelpunkt steet déi nei eenheetlech Steierklass U. An Zukunft soll d'Besteierung net méi vum Familljestand ofhänken, mee vum individuellen Akommes. Besonnesch déi 325.000 Menagen, déi haut an der Steierklass 1 sinn, profitéiere vun enger däitlecher Entlaaschtung. Bei engem ugepasste besteierbaren Akommes vu 50.000 Euro kënne bis zu 2.600 Euro Steieren am Joer gespuert ginn. Dat entsprécht enger Reduktioun vun 33 Prozent. Och d'Famillje ginn net vergiess. Fir Kanner ënner dräi Joer gëtt en neie steierlechen Abattement vu 5.400 Euro agefouert. De Steierkreditt fir Elengerzéiend gëtt erhéicht. A fir bestoend bestueten oder gepacste Koppele gëtt et eng Iwwergangsphas vu 25 Joer, an där si ënner de gesetzleche Konditiounen déi gemeinsam Besteierung kënne bäibehalen. Eng weider wichteg Neierung ass déi automatesch Upassung vun de Steierbarèmen no véier Indextranchen. Domat soll verhënnert ginn, datt d'Inflatioun d'Leit ëmmer méi staark steierlech belaascht. Fir d'Diane Adehm geet et bei dëser Reform net nëmmen ëm Steieren, mee och ëm Gerechtegkeet, méi finanziell Onofhängegkeet a méi Sécherheet bei Verännerungen am Liewen. Mat enger Entlaaschtung vun insgesamt ronn 850 Milliounen Euro d'Joer ass dëst e staarkt Signal fir d'Kafkraaft vun de Bierger.

Als déi déifgräifendst Strukturreform vum Lëtzebuerger Steiersystem zanter 1967 huet den CSV-Deputéierte Michel Wolter déi nei Steierreform bezeechent. Eng Reform, déi zanter Joerzéngten diskutéiert a vu ville Regierunge versprach gouf, gëtt elo ënnert dem CSV-Finanzminister Gilles Roth Realitéit. Fir de Michel Wolter ass dat e richtege Meilensteen an der Steierpolitik. Mat der Aféierung vun der individueller Besteierung gëtt de Steiersystem un déi gesellschaftlech Realitéit ugepasst. An Zukunft soll net méi de Familljestand, mee dat individuellt Akommes fir d'Besteierung ausschlaggeebend sinn. Dobäi bleiwe wichteg Grondprinzippie wéi d'Progressivitéit, d'Solidaritéit an déi sozial Ëmverdeelung bestoen. De Michel Wolter huet besonnesch d'Entlaaschtung vun de klengen a mëttleren Akommes ervirgehuewen. Duerch den neie Steierbarème gëtt de sougenannte Mëttelstandsbockel reduzéiert. A senger Ried ass de Michel Wolter och op d'Kriticke vun der Oppositioun agaangen. Hien huet de Virworf zeréckgewisen, d'Reform géif virun allem den héijen Akommes zeguttkommen. Grad bei de klengen a mëttleren Akommes wier déi relativ steierlech Entlaaschtung besonnesch grouss. Fir d'CSV steet hannert dëser Reform eng fundamental politesch Iwwerzeegung: D'Leit solle méi vun deem Geld behalen, dat si selwer verdéngen, an eigenstänneg decidéiere kënnen, wéi si et ausginn. Dobäi huet de Michel Wolter och d'Wichtegkeet vun engem effizienten Ëmgang mat de staatlechen Ausgabe betount. „Mir individualiséieren d'Besteierung vum Akommes, net d'Verantwortung vum Staat vis-à-vis vun de Famillen“, esou de Michel Wolter. D'Reform wier domat net nëmmen eng Ännerung vum Steierbarème, mee géif och d'Verhältnis tëscht dem Bierger an dem Staat nei definéieren.

Fir den CSV-Finanzminister Gilles Roth ass d'Steierreform e wichtege Schrëtt a Richtung méi Steiergerechtegkeet a méi Kafkraaft. Si passt de Steiersystem un déi gesellschaftlech Realitéit un, ouni déi bestoend Familljen ze benodeelegen. De Minister huet och de Käschtepunkt vun der Reform verdeedegt a betount, datt de sozialen Zesummenhalt méi wichteg wier wéi reng Scholdestatistiken. Fir de Gilles Roth ass dës Reform „eng Investitioun an d'Leit, an all Famill an an d'Zukunft vun eisem Land“.

An enger Welt voller Konflikter an Onsécherheete brauch Europa eng staark a selbstbewosst Aussepolitik. Dat huet den CSV-Fraktiounschef Laurent Zeimet am Kader vun der Debatt iwwert d’Lëtzebuerger Aussepolitik ënnerstrach. Hien huet eng weider Ënnerstëtzung vun der Ukrain gefuerdert a betount, datt Europa méi Verantwortung fir seng eege Sécherheet iwwerhuele muss. Och zum Noen Osten huet hie kloer Positioune bezunn: géint den iranesche Regime a fir eng Zwee-Staate-Léisung tëscht Israel a Palestina. Géintiwwer den USA a China huet de Laurent Zeimet fir méi europäesch Eegestännegkeet plädéiert. De Benelux kéint dobäi eng Virreiderroll spillen. Säi Message: Lëtzebuerg ass kleng, mee huet eng Stëmm op der internationaler Bün. Déi muss et notzen, fir Fridden, Fräiheet an Zesummenaarbecht ze verdeedegen.

Mat dräi steierleche Mesuren aus dem Tripartite-Accord gëtt d'Kafkraaft vun de Bierger weider gestäerkt.De Steierkredit fir de Mindestloun gëtt an zwou Etappen op 200 Euro de Mount erhéicht. Zesumme mat der geplangter Hausse vum Mindestloun bedeit dat ronn 200 Euro netto méi de Mount fir eng Persoun mam onqualifizéierte Mindestloun an der Steierklass 1. Zousätzlech gëtt en temporäre Steierkreditt agefouert, deen d'Leit réckwierkend vum 1. Juni 2026 un entlaascht. Och beim Bauspuere gëtt et eng Verbesserung: Vun 2027 u kënne bis zu 1.344 Euro d'Joer steierlech ofgesat ginn, onofhängeg vum Alter. Déi aktuell Altersgrenz vu 40 Joer fält ewech. Dës Mesure sinn e weidere konkrete Schrëtt, fir besonnesch déi méi kleng Akommes ze entlaaschten an d'Leit beim Uschafe vun engem eegenen Doheem z’ënnerstëtzen, esou d’Rapportrice vum Gesetzesprojet, d’Diane Adehm.

Den CSV-Finanzminister Gilles Roth huet déi breet Zoustëmmung an der Chamber begréisst an den Tripartite-Accord als Beweis fir e funktionéierende Sozialdialog ervirgehuewen. Mat dëse Mesurë géif d'Kafkraaft gestäerkt, besonnesch bei de Leit mam Mindestloun, an dobäi och der Kompetitivitéit vun de Betriber Rechnung gedroe ginn.

Wien iwwer de Pensiounsalter eraus weiderschafft, ka bis zu 9.000 Euro d'Joer vu sengem besteierbaren Akommes ofsetzen. Dëse steierleche Virdeel gëtt elo och op Leit mat enger progressiver Pensioun am privaten an am ëffentleche Secteur ausgebaut. D'CSV-Deputéiert Diane Adehm huet de Gesetzesprojet an der Chamber virgestallt. D'Ännerunge gëlle réckwierkend vum Steierjoer 2026 un. Fir d'CSV ass et wichteg, d'Leit z'encouragéieren, méi laang berufflech aktiv ze bleiwen. Esou kënnen d'Betriber an de Staat weider vun hirer Erfarung an hirem Know-how profitéieren.

Den CSV-Finanzminister Gilles Roth huet betount, datt dëse steierleche Virdeel nach ze wéineg bekannt ass. Hie wëllt dofir zesumme mat de concernéierte Verwaltungen dofir suergen, datt d'Leit besser informéiert ginn an den Abattement an Zukunft méiglechst automatesch um Paiziedel berücksichtegt gëtt.

Fir déi héich Präisser vun den Düngemëttel deelweis opzefänken, kréien d'landwirtschaftlech Betriber eng finanziell Ënnerstëtzung vu 35 Euro pro Hektar, mat engem Maximum vun 10.000 Euro pro Betrib. D'Mesure ass Deel vum Tripartite-Accord a soll d'Betriber entlaaschten, déi nieft den héije Produktiounskäschten och ënnert der Dréchent vun dësem Summer leiden, esou de Rapporter vum Gesetz, de Jeff Boonen. D'Hëllef kënnt och Bio-Betriber zegutt. Den CSV-Deputéierten huet begréisst, datt d'Landwirtschaft fir d'éischte Kéier un der Tripartite bedeelegt war. Et ass wichteg, de Betriber elo séier ze hëllefen a gläichzäiteg hir Widderstandsfäegkeet laangfristeg ze stäerken. Schliisslech geet et och ëm eis Liewensmëttelproduktioun an Ernärungssécherheet, esou de Jeff Boonen.

D'CSV-Landwirtschaftsministesch Martine Hansen huet betount, datt déi insgesamt 4,2 Milliounen Euro Finanzhëllef zu engem wichtege Moment kommen, wou vill Betriber ënnert den héijen Energie- an Düngerpräisser leiden. D'Sue sollen och esou séier wéi méiglech ausbezuelt ginn.

Mat der Schafung vun der Agence luxembourgeoise des médicaments et produits de santé (ALMPS) kritt Lëtzebuerg eng eegen Autoritéit, déi d'Qualitéit, d'Sécherheet an d'Wierksamkeet vu Medikamenter a Gesondheetsprodukter fir Mënsch an Déier iwwerwaacht. Déi nei Agence iwwerhëlt Kompetenze vun der Direction de la Santé a gëtt och fir d'Iwwerwaachung vu klinesche Studien an d'Fréierkennung vu méigleche Risiken an Niewewierkungen zoustänneg, esou d’Rapportrice vum Gesetz, Françoise Kemp. Dës Agence ass e wichtege Schrëtt, fir d'Patientensécherheet ze stäerken an dofir ze suergen, datt Lëtzebuerg och op europäeschem Niveau eng kompetent Stëmm am Beräich vun der Medikamentesécherheet huet, esou d’CSV-Deputéiert.

D'Gesondheetsministesch Martine Deprez huet betount, datt déi nei Agence méi Flexibilitéit erméiglecht, fir séier op nei Erausfuerderungen ze reagéieren an déi néideg Spezialisten anzestellen. Si huet och d'Wichtegkeet vun der gesetzlecher Verankerung vun der Réserve sanitaire ënnerstrach, eng Léier aus der Covid-Pandemie.

Wat geschitt, wann e wichtegt Medikament net méi disponibel ass? Mat dëser Fro huet d'CSV-Deputéiert Françoise Kemp sech am Kader vun enger Interpellatioun an der Chamber beschäftegt. Lëtzebuerg ass bei der Medikamenteversuergung staark vum Ausland ofhängeg, besonnesch vun der Belsch. D'Françoise Kemp huet déi strukturell Mesurë vun der Regierung ervirgehuewen: Mat der neier nationaler Akafs- a Logistikzentral (CNAL) solle strategesch Reserven opgebaut a Liwwerengpäss besser opgefaange ginn. Déi nei Medikamentenagence (ALMPS) soll d'Iwwerwaachung vum Marché verbesseren. Donieft huet si sech fir méi Genericken um Lëtzebuerger Marché a fir eng méi enk europäesch Zesummenaarbecht ausgeschwat. Versuergungsengpäss sollen esou fréizäiteg erkannt a séier reagéiert ginn, fir d'Behandlung vun de Patienten esou gutt wéi méiglech ofzesécheren.

D'Gesondheetsministesch Martine Deprez huet betount, datt de Patient ëmmer am Mëttelpunkt stoe muss. Si huet sech fir eng besser Fréierkennung vu Medikamente-Penurien, méi Informatioun fir Patienten a Gesondheetsberuffer an eng weider Digitaliséierung ausgeschwat. Bis 2029 soll de Medikamentecircuit digitaliséiert ginn, fir d'Patientesécherheet weider ze verbesseren.