Här President,
Esou wéi den Artikel 80 vum Chambersreglement et virgesäit, bieden ech Iech, dës parlamentaresch Fro un den Här Minister fir Educatioun, Kanner a Jugend weiderzeleeden.
Den DAP Educatioun ass eng beruffspraktesch Ausbildung am soziopedagogeschen Encadrement, déi op d’Aarbecht mat Kanner (a jee no Struktur och mat Jugendlechen) virbereet. Déi initial Formatioun dauert 3 Joer an am Kär dovu sti fënnef Stagë vu jee 6 Wochen, fir d’Realitéit um Terrain kennenzeléieren. An der formation adulte brauch een e Léiervertrag an enger Betreiungsstruktur. Dobäi geet een 2 Deeg d’Woch op den Terrain a verbréngt 3 Deeg am Ausbildungsbetrib.
An enger Zäit, wou d’Betreiungsstrukturen an d’Personalressourcen am Secteur staark gefuerdert a belaascht sinn, ass et wichteg, datt d’Formatiounen, déi direkt op dës Beruffer virbereeden, transparent, kohärent a qualitativ ofgeséchert ëmgesat ginn, besonnesch wat d’Stagen/Léierplazen, d’Betreiung um Terrain an d’Ursaache vun Ofbréch ugeet.
An deem Kontext wollt ech follgend Froen un den Här Minister fir Educatioun, Kanner a Jugend stellen:
Kann de Minister no Regioun an no Typ vu Struktur opweisen, wéi vill Plazen aktuell fir den DAP Educatioun besat sinn?
Wéi gesäit de Bilan vun de leschten 3 Joer aus (Erfollegsquote, Widderhuelungen, Ofbréch, Kënnegung vum Léiervertrag)?
Wat ass de Feedback vun de Strukturen, déi Stagiairen/Léierleit, Regionaldirektiounen ophuelen?
Wéi oft (Zuele pro Joer) kënnt et vir, datt een de Léiervertrag ofbrécht oder datt eng Struktur d’Zesummenaarbecht ofbrécht? Wat sinn déi heefegst Ursaachen?
Wéi ginn Zäit, Responsabilitéiten, Opsiicht an Evaluatioun am Binôme definéiert?
Kréien d’Tuteuren um Terrain eng Formatioun oder Guideline, a gëtt et eng Unerkennung oder Kompensatioun fir dës Roll?
Här President, bieden ech Iech, mäin déifste Respekt unzehuelen.
Ricardo MARQUES