Wéi kann déi sozial Mixitéit an alle Géigende gestäerkt ginn ?

Réponse à la question N° 3213 (Question écrite) de Madame Martine Hansen, Députée concernant Index socio-économique, par Monsieur Pierre Gramegna, Ministre des Finances, Monsieur Etienne Schneider, Ministre de l’Economie, Monsieur Claude Meisch, Ministre de l’Education nationale, de l’Enfance et de la Jeunesse, Monsieur Dan Kersch, Ministre de l’Intérieur: QP 3213

Här President,

Esou wéi den Artikel 80 vum Chambersreglement et virgesäit, géif ech Iech bieden folgend parlamentaresch Fro un d‘Hären Finanz-, Wirtschafts-, Educatiouns- an Inneminister, sou wéi den Här Minister fir Nohalteg Entwécklung an Infrastrukturen weiderzeleeden.

An enger rezenter Etüd vum nationale Statistikamt, dem Statec, goufe grouss Ënnerscheeder tëscht de Gemengen a punkto sozio-ekonomeschen Index festgestallt. Des Ënnerscheeder sollen sech laut Statec an de leschten Joren nach verstäerkt hunn. De Statec erkläert weider, dass :

« Une spirale défavorable est à l’œuvre en matière de développement spatial, qui tend à accentuer les processus ségrégatifs. Les territoires les plus prisés tendent en effet à attirer les populations les plus favorisées, qui vont renforcer davantage leur réputation. A l’inverse, les populations les moins favorisées tendent à se concentrer dans des territoires moins attractifs, mais également plus accessibles en termes de coûts. »  

Dës Evolutioun géif déi sozial Mixitéit am Land menacéieren.

Aus der Statec-Etüd geet och ervir, dass déi Gemengen mat engem favorabelen sozio-ekonomeschen Index am Anzuchsgebitt vun der Stad Lëtzebuerg leien. Vun de 15 bescht klasséierte Gemengen leien der 6 am Kanton Lëtzebuerg, 4 am Kanton Grevenmacher, 3 am Kanton Capellen an 2 am Kanton Esch-Uelzecht. Frappant ass, dass sech keng Nord-Gemeng ënnert de 15 Éischte befënnt. Ierpeldeng-op-der-Sauer schneit op der 30. Plaz als stäerksten Nord-Gemeng of.

Weider kann ee feststellen, dass duerch d’Gemengefinanzreform déi Gemengen, déi de schwächsten sozio-ekonomeschen Index opweisen, alleguer eppes bäikréien. An der Kategorie vun de Gemengen, déi a Saachen sozio-ekonomeschen Index am zweetschlechsten ofschneiden, do kréien och all Gemengen eppes bäi, ausser eng hallef-dosen Gemengen am Norden vum Land.

Ähnlech huet et schonn am Bildungsbericht 2015 geheescht, wou den ISEI, dat heescht International Socio-Economic Index of Occupational Status pro Gemeng verglach gouf. Dëse stellt dann och fest, dass :

Ein großer Teil der befragten Familien im Norden sowie der Minettgegend im Süden des Landes stehen sozioökonomisch schlechter dar als diejenigen im Zentrum rund um Luxemburg-Stadt.“

Ech wéilt duerfir folgend Froen un d‘Häre Ministeren riichten:

  • Wéi gesäit d’Regierung d’Bedeitung vun der “sozialer Mixitéit” an allen Géigenden vum Land?

  • Wat gedenkt d’Regierung ze maachen fir déi sozial Mixitéit an allen Géigenden vum Land ze stäerken?

  • Wat gedenkt d’Regierung ze maachen, fir de Gemengen mat schwaachem sozio-ekonomeschen Index ze hëllefen?

  • Wat gesäit d’Regierung konkret fir déi „schwächste“ Gemengen a punkto Aarbechtsplazen vir, och wat déi sougenannten „professions à haut niveau“ ubelaangt? Wéi gedenkt d’Regierung d’Attraktivitéit vun deene Gemengen soss nach ze steigeren?

Mat déifstem Respekt,

Martine Hansen
Députée

Zréck